Starfsnámsbrautir

MEISTARANÁM (MN), almennt nám

Markmið meistaranáms er að veita fræðslu og þjálfun þeim sem lokið hafa sveinsprófi svo að þeir geti staðið fyrir sjálfstæðum rekstri í iðngrein sinni, stjórnað verkum og kennt nýliðum vinnubrögð, öryggisreglur og iðnfræði. Námið er eðlilegt framhald iðnnáms. Möguleikar eru á framhaldsnámi í iðnfræði og tæknifræði við Tækniskóla Íslands. Inntökuskilyrði eru fullgilt sveinspróf og eins árs vinna undir stjórn meistara að því loknu. Þeir sem luku sveinsprófi 1. janúar 1989 eða síðar skulu stunda nám við meistaraskóla með fullnægjandi árangri til þess að fá útgefið meistarabréf.
Þeir námsáfangar sem eru sameiginlegir öllu meistaranámi eru tilgreindir hér og sá fjöldi viðbótareininga sem nemendur geta valið eða bundnar eru viðkomandi iðngrein.

Alls 25 - 42 einingar

Nánari upplýsingar um námsgreinar og námsáfanga einstakara iðngreina eru í sérstakri námskrá fyrir meistaranám.

SJÚKRALIÐABRAUT (SJ) 120 ein.

Sjúkraliðabraut er ætlað að búa nemendur undir sjúkraliðastörf. Til viðbótar námi á brautinni verða nemendur að vinna fjóra mánuði á sjúkrastofnun og geta að því loknu sótt um löggildingu á starfsheiti til heilbrigðis- og tryggingaráðuneytis. Meðalnámstími á sjúkraliðabraut er 6 annir í skóla auk 4 mánaða starfsþjálfunar.
Bóklegar greinar 44 ein.

STARFSBRAUT (ST4)

Starfsbraut er ætlað að búa nemendur undir þátttöku í þjóðfélaginu á eigin forsendum.  Leitað er leiða til að finna styrkleika og áhugasvið hvers og eins, með það að markmiði að styðja viðkomandi til aukins þroska, frekara náms og starfshæfni.  Náminu er ætlað að efla sjálfstraust, sjálfstæði og lífsgleði nemendanna og hvetur þá og styður í viðfangsefnum sínum á heimili, starfi og í tómstundum. Starfsþjálfun er hluti af náminu og fer að mestu leyti fram á vinnustöðum.  Þetta nám gefur ekki starfsréttindi, hins vegar býr það nemendur undir þátttöku á vinnumarkaðinum og auðveldar þeim að fá vinnu við hæfi.  Námstími er allt að 4 árum og fer eftir óskum og þörfum hvers nemanda.