Um skólann
2.1 Saga skólans
Fjölbrautaskóli Norðurlands vestra á Sauðárkróki var settur í fyrsta sinn 22. september 1979 en fram að þeim tíma hafði iðnskóli verið starfandi á Sauðárkróki frá 1946. Þeim fjölgaði jafnt og þétt frá 1992. Haustið 1979 voru 82 nemendur við nám í skólanum en haustið 1999 voru hátt í 500 nemendur skráðir í skólann. Framhaldsdeildir hafa verið starfræktar á Siglufirði og Blönduósi þegar skilyrði til reksturs þeirra hafa leyft.
2.2 Skipulag skólans
2.2.1 Skipurit FNV
Fjölbrautaskóli Norðurlands vestra starfar samkvæmt lögum nr. 80/1996 um framhaldsskóla undir yfirstjórn menntamálaráðherra. Skipulag yfirstjórnar skólans skv. 1. grein reglugerðar um starfslið og skipulag framhaldsskóla nr. 5/2001.
2.2.2 Einkunnarorð skólans: Vinnusemi, virðing, vellíðan.
Stjórnendur leitast við á hverjum tíma að skapa þær aðstæður á vinnustað að þar ríki vinnusemi, gagkvæm virðing starfsfólks og nemenda og vellíðan allra sem við skólann nema og starfa.
2.2.3 Hlutverk, markmið og áherslur í starfi
Hlutverk skólans er kennsla til stúdentsprófs á bóknámsbrautum og kennsla á iðn- og starfsnámsbrautum, starfræksla sérdeildar fyrir fatlaða nemendur og fjarkennsla um fjarfundabúnað allt með áfanga og fjölbrautasniði.
Markmið með skólastarfinu er að stuðla að alhliða þroska nemenda, búa þá undir störf og frekara nám, efla með þeim ábyrgðarkennd og víðsýni, þjálfa þá í öguðum vinnubrögðum, kenna þeim að njóta menningarlegra verðmæta og hvetja þá til stöðugrar þekkingarleitar.
Fjölbrautaskóli Norðurlands vestra kappkostar að bjóða nemendum sínum upp á fjölbreytt námsframboð, bæði á sviði bók- og verknáms. Hann leitast við að veita nemendum sínum sem besta þjónustu og aðgengi að námi við skólann.
Markmiðum þessum hyggst skólinn ná með því að: sem fjölbreyttasta kennsluhætti sem hæfa viðfangsefni kennara og nemenda hverju sinni.
Markmiðum þessum hyggst skólinn ná með því að:
1. leitast við að ráða til starfa fólk með góða menntun, hæfni og áskilin starfsréttindi,
2. hvetja starfsfólk til að afla sér viðbótar- og endurmenntunar,
3. leitast við að bjóða upp á endurmenntun starfsfólks í heimabyggð eftir því sem aðstæður leyfa,
4. bjóða kennurum og öðru starfsfólki upp á góða vinnuaðstöðu,
5. bjóða nemendum upp á góða aðstöðu til heimanáms og verkefnavinnu,
6. bjóða kennurum og nemendum upp á gott aðgengi að tölvum, tækjum og verkfærum sem eru í takt við kröfur tímans.
2.2.4 Áfangakerfi
Skólinn starfar eftir áfanga- og annakerfi (sbr. I. hluta). Fyrir nýnema úr grunnskóla eru þetta talsverð viðbrigði, nemandi tilheyrir ekki lengur ákveðnum bekk, heldur allmörgum ólíkum námshópum. Áfangakerfið felur í sér töluvert frelsi nemenda til að skipuleggja nám sitt en jafnframt er aukin ábyrgð á hverjum og einum nemanda; hann fylgir ekki lengur sjálfkrafa einhverjum bekk. Það er sérstaklega mikilvægt að nemendur líti á skólann sem vinnustað og notfæri sér hina frábæru aðstöðu á bókasafni skólans til að sinna heimanámi.
2.2.3 Skólanefnd
Skólanefnd er skipuð fimm mönnum, tveimur fulltrúum tilnefndum af sveitarfélögum og þremur án tilnefningar af menntamálaráðherra. Áheyrnarfulltrúar eru tveir með málfrelsi og tillögurétt, annar tilnefndur af kennurum skólans en hinn af nemendafélagi skólans. Áheyrnarfulltrúar eru tilnefndir til eins árs í senn. Skólameistari situr fundi skólanefndar og er framkvæmdastjóri hennar. Skólanefnd markar áherslur í starfi skólans og gerir starfs- og fjárhagsáætlanir. Nefndin ákveður upphæð innritunargjalds og efnisgjalds.
Hlutverk skólanefndar er m.a. að stuðla að því að skólinn þróist þannig að hann hafi sem mest gildi fyrir skólasvæðið og sem mest tengsl við aðra starfsemi er þar fer fram, einkum á sviði menningar- og atvinnulífs.
2.2.4 Skólaráð
Skólaráð aðstoðar skólameistara við stjórn skólans. Skólameistari er oddviti skólaráðs sem auk hans skal skipað fulltrúum kennara og nemenda, svo og aðstoðarskólameistara og áfangastjóra. Námsráðgjafi og umsjónarkennari sitja fundi skólaráð án atkvæðisréttar.
Skólaráð skal m.a.:
- vera skólameistara til aðstoðar og ráðgjafar um stjórn skólans og daglegan rekstur,
- fjalla um starfsáætlun skólans og framkvæmd hennar,
- fjalla um skólareglur, vinnuaðstöðu starfsliðs og nemenda, svo og félagsaðstöðu nemenda og kennara,
- veita umsögn um erindi frá skólanefnd, almennum kennarafundum, nemendaráði, einstaklingum, skólameistara og menntamálaráðuneytinu sé þess óskað,
- fjalla um mál sem upp kunna að koma og varða einstaka nemendur og kennara.
2.2.5 Stjórnunarteymi (fimmundarráð)
Við skólann er starfandi stjórnunarteymi sem í eiga sæti auk skólameistara; aðstoðarskólameistari, áfangastjóri, námsráðgjafi og eftir atvikum umsjónarkennari. Tveir þeir síðasttöldu eru stjórnendum til ráðuneytis við stefnumótun og töku ákvarðana í einstökum málum. Teymið fundar sem næst vikulega og oftar ef þörf krefur.
2.2.6 Samstarfsnefnd
Samkvæmt síðustu kjarasamningum er starfandi samstarsnefnd við skólann. Samningsaðilar tilnefna tvo fulltrúa og jafnmarga til vara í samstarfsnefnd sem hafa m.a. það hlutverk að fjalla um forsendur starfaflokkunar og röðunar starfa í launaflokka og koma á sáttum í ágreiningsmálum sem rísa kunna út af samningi þessum. Eins skal nefndin fjalla um röðun starfa skv. 25. gr. laga nr. 94/1986, um kjarasamninga opinberra starfsmanna.
Hvor aðili um sig getur skotið ágreiningsefnum til nefndarinnar og kallað hana til starfa. Fundi í samstarfsnefnd skal halda einu sinni í mánuði á meðan óafgreidd mál liggja fyrir nefndinni en oftar ef þurfa þykir. Fundi skal boða með dagskrá og fundargerð síðasta fundar.
Samstarfsnefnd skal svara erindum innan fimm vikna frá því að þau voru fyrst borin formlega fram á fundi nefndarinnar. Verði samstarfsnefnd sammála um breytingar á röðun eða öðru því sem til hennar hefur verið vísað skal sú breyting gilda frá og með næstu mánaðamótum eftir að erindið var fyrst formlega borið fram í nefndinni, nema annað sé sérstaklega ákveðið af henni.
2.2.7 Samstarfshópur um nemendaheill
Við skólann starfar samsstarfshópur um nemendaheill sem í eiga sæti auk skólameistara; námsráðgjafi, forvarnafulltrúi, fulltrúi lögreglu og heimavistarvörður. Meginhlutverk hópsins er að vera skólameistara til ráðuneytis um málefni sem varða velferð og vellíðan nemenda skólans og einstök mál sem upp kunna að koma.
2.2.8 Starfsmannastefna FNV
2.2.8.1. Ábyrgð á starfsmannastefnu og starfsmannamálum.
Skólameistari ber ábyrgð á starfsmannastefnu Fjölbrautaskóla Norðurland vestra á Sauðárkróki og öllum starfsmannamálum skólans sbr. ákvæði 8. gr. laga nr. 80/1996 um framhaldsskóla og reglugerð nr. 5/2001 um starfslið og skipulag framhaldsskóla og erindisbréf skólameistara. Skólameistari er ábyrgur fyrir að skipurit skólans sé öllum starfsmönnum skólans aðgengilegt ásamt greinagóðum starfs- og verklýsing fyrir öll störf sem unnin eru í skólanum.
2.2.8.2 Ábyrgð og skyldur stjórnenda og annarra starfsmanna
Stjórnendur og starfsmenn bera jafna ábyrgð á að vinna að markmiðum skólans og veita sem besta þjónustu nemendum, foreldrum, forráðmönnum og öðrum þeim sem til skólans leita. Stjórnendur skulu tileinka sér ábyrga og lýðræðislega stjórnunarhætti og auðsýna jákvætt og uppörvandi viðmót í garð starfsmanna sinna og nemenda. Þeir skulu leitast við að hafa sem virkast upplýsingastreymi til starfsmanna sinna. Skal nánar setja skólanum boðskiptareglur í samvinnu kennara og annarra starfsmanna og er stefnt að því að þær liggi fyrir í lok vorannar 2005. Þá skulu stjórnendur hvetja starfsmenn til að taka framförum í starfi.
Starfsmönnum Fjölbrautaskóla Norðurlands vestra ber að sýna kurteisi, lipurð, réttsýni, alúð og samviskusemi í öllum störfum sínum. Þeir skulu mæta stundvíslega til starfa og forðast að aðhafast nokkuð í starfi sínu og utan þess sem rýrt getur trúverðugleika og traust þeirra. Starfmenn skóla starfa samkvæmt lögum, reglugerðum, erindisbréfum, skólanámskrá og gildandi fyrirmælum á hverjum tíma svo og ákvörðun skólameistara um skiptingu starfa milli starfsmanna. Þeim er skylt að hlýða löglegum fyrirskipunum skólameistara sbr. 15. gr. laga nr. 70/1996 um réttindi og skyldur starfsmanna ríkisins. Starfsmaður skal gæta þagmælsku um atriði sem tengjast starfi hans skv. lögum þar að lútandi og fyrirmælum yfirmanns.
Starfsmanni ber, áður en hann stofnar til atvinnurekstrar eða tekur að sér starf í þjónustu annars aðila samhliða starfi, að greina skólameistara frá því sbr. lög um réttindi og skyldur starfsmanna ríkisins nr. 70/1996. Starfsmenn skulu leitast við að fylgjast með nýjungum á starfssviði sínu og vera reiðubúnir til að takast á við ný og breytt verkefni.
2.2.8.3 Jafnréttisáætlun
Markmið jafnréttisáætlunar Fjölbrautaskóla Norðurlands vestra er að stuðla að jafnrétti einstaklinga, jafnri stöðu kvenna og karla innan skólans og minna á mikilvægi hins stjórnarskrárbundna réttar að:
"Allir skulu vera jafnir fyrir lögum og njóta mannréttinda, án tillits til kynferðis, kynhneigðar, trúarbragða, stjórnmálaskoðana, uppruna, litarháttar, efnahags, ætternis, fötlunar, sjúkdóma eða annarrar stöðu".
1. Í skólastarfinu skal unnið að jafnrétti til menntunar með því að stuðla að því að hver einstaklingur nýti hæfileika sína sem best, án hamlandi áhrifa hefðbundinna kynjaímynda.
2. Fjölbreyttar kennsluaðferðir og kennslugögn verði notuð til að höfða sem best til beggja kynja og nemenda með ólíka getu og þarfir.
3. Veitt verði fræðsla um jafnréttismál, þar sem áhersla verði lögð á styrkleika beggja kynja, skyldur þeirra og réttindi.
4. Jafnræði kynja skal haft að leiðarljósi við ráðningu starfsfólks. Unnið skal gegn kynbundnum launamun m.a. með gerð starfslýsinga, ákvörðun fastra launa, yfirvinnu, svo og ákvörðun um aukagreiðslur og fríðindi. Bæði kyn skulu hafa sömu möguleika til starfsþjálfunar, endurmenntunar og starfsframa.
5. Framfylgja skal fjölskyldustefnu, þar sem báðum foreldrum verði gert kleift að sinna uppeldishlutverki sínu og réttindi þeirra skulu virt um fæðingarorlof, veikindi barna og sveigjanleika í vinnutíma vegna fjölskylduaðstæðna.
6. Allir nemendur og starfsmenn eiga rétt á því að komið sé fram við þá af virðingu. Einelti, kynferðisleg áreitni og annað ofbeldi verður ekki liðið.
7. Árlega skal gera úttekt á því hvernig til hafi tekist að framfylgja áætluninni
og skal hún endurskoðuð með tilliti til niðurstöðunnar.
8. Jafnréttisfulltrúi skal kosinn á starfsmannafundi til tveggja ára.
Samþykkt á kennarafundi 16. mars 2005
2.2.8.4 Starfslýsingar
Fjölbrautaskóli Norðurlands vestra á Sauðárkróki gerir starfslýsingar fyrir öll störf sem unnin eru innan skólans. Skólameistari gengur frá starfslýsingum í samráði við viðkomandi starfsmann. Þegar ráðið er í nýtt starf skal starfslýsing ávallt liggja fyrir. Þegar nýir starfsmenn koma til starfa skal þeim tryggð leiðsögn um skólastarfið. Sjá kafla 2.5.
2.2.8.5 Starfsmannaviðtöl
Skólameistari annast viðtöl við starfsmenn sína í þeirri viðleitni skólans að auka vellíðan og starfshæfni hvers og eins. Hverjum starfsmanni skal gefinn kostur á a.m.k. einu viðtali á ári þar sem hann getur komið sjónarmiðum sínum á framfæri.
Fastur þáttur í starfsmannaviðtölum skal vera að ræða veikleika og styrkleika skólahaldsins og markmið þess. Skal starfsmanni gefið tækifæri til að tjá sig um líðan sína í starfi og setja fram óskir um betrumbætur á starfsaðstöðu sinni. Þá skal yfirfara verklýsingar og starfslýsingar eftir atvikum.
2.2.8.6 Starfsaðstaða
Unnið verður að því að koma heimilum allra kennara í þráðlaust samband við netþjónustu skólans til að gera þeim unnt að vinna frá heimili sínu að verkefnum tengdum starfi í skóla og til endurmenntunar. Stefnt skal að stuðningi við fartölvuvæðingu kennara og gerð fjárhagsætlun um stuðninginn ekki síðar en haustið 2005 og þá gerður samningur um notkun og endurnýjun búnaðar.
2.2.8.7 Símenntun
Fjölbrautaskóli Norðurlands vestra hvetur starfsmenn sína til að viðhalda og auka færni sína í starfi með símenntun af ýmsu tagi bæði innan skólans og utan. Það er á ábyrgð starfsmanns og yfirmanns hans að viðhalda og auka fagþekkingu viðkomandi. Gera skal árlega könnun á óskum starfsmanna um námskeiðahald fyrir starfsmenn skólans og niðurstöður hennar kynntar á starfsmannafundi.
2.2.8.8 Starfsandi
Fjölbrautaskóli Norðurlands vestra leggur áherslu á góðan starfsanda sem byggir á jákvæðu viðmóti, kurteisi, umburðarlyndi og gagnkvæmri virðingu starfsmanna. Hegðun verður ekki liðin sem brýtur gegn almennu velsæmi eða veldur á annan hátt vanlíðan eða óþægindum. Þetta á t.d. við um einelti og kynferðislega áreitni.
2.2.8.9 Öryggismál og vinnuvernd
Vinnuumhverfi skal vera skv. lögum og reglugerðum um aðbúnað, hollustuhætt, öryggi á vinnustöðum (nr. 46/1980) og reglum um heilbrigðis- og öryggisstarf fyrirtækja (nr. 77/1982). Setja skal á laggirnar sérstaka öryggisnefnd. Starfsmenn kjósa úr sínum hópi tvo fulltrúa og skólameistar tilnefnir tvo fulltrúa. Báðir fulltrúar skólameistara teljast öryggisverðir og báðir fulltrúar starfsmanna öryggistrúnaðarmenn. Þeir skulu í samvinnu fylgjast með því, að aðbúnaður, hollustuhættir og öryggi á vinnustað séu í samræmi við lög og reglur. Fólk í öryggisnefnd skal tilnefnt og kosið til tveggja ára.
2.2.8.10 Viðvera og vinnutími
Fjölbrautaskóli Norðurlands vestra á Sauðárkróki leggur áherslu á stundvísi og umsamda viðveru starfsmanna sinna. Skólameistari hefur umsjón með ástundun og stundvísi starfsmanna og gerir viðeigandi athugasemdir við þá ef tilefni er til.
1. Kennarar í fullu starfi skili vinnu sinni á tímabilinu 8 til 16.10 virka daga vikunnar.
2. Kennarar í meira en fullu starfi geta búist við að hluti yfirvinnu falli utan dagvinnumarka.
3. Kennari, sem óskar eftir því að kenna annaðhvort fyrir eða eftir hádegi, getur ekki gert kröfu um hærra starfshlutfall en 50%.
Til að ná þessum þremur markmiðum skulu töflusmiðir leitast við að gera stundaskrár nemenda með tilliti til námskrár, vals nemenda og markmiða þeirra með námi sínu og að hafa þær sem samfelldastar. Þá skal taka mið af óskum kennara eftir því sem mögulegt er án þess að brjóta meginreglur um jafnræði og markmið skólans að öðru leyti.
2.2.8.11 Notkun vímuefna
Öll notkun vímuefna (þar með talið notkun tóbaks) er bönnuð í húsnæði og á skólalóð Fjölbrautaskóla Norðurlands vestra á starfstíma hans með vellíðan og hagsmuni starfsmanna að leiðarljósi. Skólinn leitast við að aðstoða starfsmenn við að vinna úr vandamálum sem tengjast notkun vímuefna.
2.2.8.12 Siðareglur
Starfsmönnum ber að sýna trúnað í samskiptum sínum við nemendur. Skólinn fer fram á að starfsmenn stundi ekki starfsemi sem gengur gegn hagsmunum hans eða er í samkeppni við hann. Að öðru leyti vísast til stjórnsýslulaga um sama efni og siðareglna Kennarasambands Íslands, sjá nánar hér.
2.2.8.13 Viðmið fyrir góða starfshætti ríkisstarfsmanna
Leiðbeiningar um þau viðmið og gildi sem ríkisstarfsmönnum ber að fylgja í daglegum störfum sínum, sbr. dreifibréf 1/2006 frá Fjármálaráðuneytinu:
1. Ríkisstarfsmaður gætir þess að fara vel með það vald sem honum er falið og beita því í þágu almannahagsmuna, gæta sanngirnis og meðalhófs en ekki nýta það í eigin þágu.
2. Beiti ríkisstarfsmaður mati við meðferð valds, sem honum er fengið, þar sem velja þarf á milli einstaklinga, t.d. við ráðningu í störf, úthlutun styrkja eða annarra gæða eða gerð samninga um verktöku, skal hann byggja ákvörðun sína á málefnalegum sjónarmiðum, s.s. verðleikum og hæfni. Óheimilt er að mismuna málsaðilum á grundvelli ómálefnalegra sjónarmiða, s.s. kynferðis, kynþáttar, kynhneigðar, eða samfélagslegrar stöðu að öðru leyti.
3. Ríkisstarfsmaður gætir þess að persónulegir og fjárhagslegir hagsmunir hans, fjölskyldu hans eða vina fari ekki í bága við starfsskyldur hans. Þannig skal hann t.d. ekki taka þátt í ákvörðunum ef hann tengist málsaðilum fjölskylduböndum, ef hann á sjálfur aðild að málinu eða ef það varðar vini hans eða fyrrverandi maka.
4. Ríkisstarfsmaður skal ekki þiggja eða sækjast eftir gjöfum eða fjármunum frá einstaklingum, fyrirtækjum eða öðrum sem á einn eða annan hátt tengjast starfi hans ef almennt má líta á það sem endurgjald fyrir greiða eða sérstaka þjónustu. Sanngjarnt er að víkja frá þessu ef um afmælisgjafir eða annars konar tækifærisgjafir er að ræða enda séu verðmæti þeirra innan hóflegra marka. Hafa skal samráð við yfirmann ef vafi leikur á hvort starfsmanni er heimilt að taka við gjöf.
5. Ríkisstarfsmaður skal stuðla að því að upplýsingar um ákvarðanir og starfsemi þess stjórnvalds, stofnunar eða fyrirtækis sem hann starfar hjá séu aðgengilegar almenningi enda sé ekki um upplýsingar að ræða sem leynt þurfa að fara samkvæmt lögum.
6. Ríkisstarfsmaður gætir þagmælsku um atriði er hann fær vitneskju um í starfi sínu og leynt skulu fara. Honum er óheimilt að afla sér trúnaðarupplýsinga í starfi sínu sem ekki hafa þýðingu fyrir starfið. Hann skal ekki hagnýta sér upplýsingar sem hann hefur fengið í starfi sínu og ekki hafa verið kynntar eða gerðar almennar, til þess að skapa sjálfum sér eða öðrum ávinning, þ. á m. fjárhagslegan, enda þótt ekki sé um trúnaðarupplýsingar að ræða. Ríkistarfsmaður gætir þagnarskyldu sinnar þótt hann hafi látið af starfi sínu.
7. Ríkisstarfsmanni ber að fara vel með almannafé, gæta þess að það sé vel nýtt og sé ekki notað á annan hátt en ætlast er til lögum samkvæmt.
8. Ríkisstarfsmaður sem verður var við spillingu, ólögmæta eða ótilhlýðilega háttsemi, skal koma upplýsingum um slíka háttsemi til réttra aðila. Til réttra aðila geta m.a. talist stjórnendur stofnunar, hlutaðeigandi fagráðuneyti og eftir atvikum Ríkisendurskoðun eða lögregla. Ríkisstarfsmaður sem í góðri trú greinir á réttmætan hátt frá upplýsingum samkvæmt þessum lið, skal á engan hátt gjalda þess.
2.2.8.14 Áætlun gegn einelti
Stefna
Það er stefna Fjölbrautaskóla Norðurlands vestra að starfsmenn sýni samstarfsfólki og nemendum skólans alltaf kurteisi og virðingu í samskiptum. Einelti og kynferðisleg áreitni verður undir engum kringumstæðum umborin í skólanum. Meðvirkni starfsmanna í einelti verður ekki liðin.
Skilgreining FNV á hvað einelti og kynferðisleg áreitni er styðst við reglugerð nr. 1000/2004 en þar segir í 3. gr.: Einelti: Ámælisverð eða síendurtekin ótilhlýðileg háttsemi, þ.e. athöfn eða hegðun sem er til þess fallin að niðurlægja, gera lítið úr, móðga, særa, mismuna eða ógna og valda vanlíðan hjá þeim sem hún beinist að. Kynferðisleg áreitni og annað andlegt eða líkamlegt ofbeldi fellur hér undir.
Stjórnendur bera ábyrgð á að grundvallarreglur samskipta á vinnustað séu virtar. Nýjum starfsmönnum er kynnt stefna og viðbragðsáætlun fyrirtækisins í eineltismálum strax við upphaf starfs. Stefnan og viðbragsáætlunin eru rifjaðar upp reglulega á starfsmannafundum.
Á vinnustöðum geta komið upp ágreiningsmál og hagsmunaárekstrar sem valdið geta óþægindum. Mikilvægt er að leysa slík mál án tafar áður en þau þróast til verri vegar.
Tekið verður á fölskum ásökunum um einelti af sömu festu og einelti almennt.
Komi upp einelti skulu þolendur leita til skólameistara eða aðstoðarskólameistara. Ef yfirmaður er gerandinn eða hundsar vandamálið er hægt að leita til þriggja annarra aðila (sjá næsta kafla). Þessir aðilar skulu sýna þolanda fullan trúnað.
Skólinn mun grípa til aðgerða gagnvart starfsmönnum sem leggja aðra í einelti, t.d. með áminningu, tilflutningi í starfi eða uppsögn. Alvarleg atvik verða hugsanlega kærð að höfðu samráði við þolanda. Gerandi eineltis verður látinn sæta ábyrgð.
Viðbrögð
Starfsmaður sem verður fyrir einelti eða kynferðislegri áreitni skal snúa sér hið fyrsta til skólameistara eða aðstoðarskólameistara og tilkynna um atvikið. Ef yfirmaður er gerandi málsins eða sinnir því ekki er hægt að snúa sér til tveggja annarra trúnaðarmanna.
Þegar yfirmaður eða trúnaðaraðilar fyrirtækisins fá vitneskju um einelti munu þeir bregðast við samkvæmt eftirfarandi viðbragðsáætlun. Strax er metin þörf þolanda fyrir bráðan stuðning og hann veittur. Lögð verður áhersla á að leysa málið hið fyrsta og koma í veg fyrir frekara einelti.
Auk yfirmanna skólans eru eftirfarandi trúnaðaraðilar tilbúnir að ræða við starfsmenn um meint einelti á vinnustaðnum.
1. Eiður Baldursson og Atli Már Óskarsson, öryggistrúnaðarmenn.
2. Ingileif Oddsdóttir, náms- og starfsráðgjafi.
Sá aðili, sem samband er haft við, ákvarðar síðan í samráði við þolanda hvert framhaldið verður sbr. lýsingu á ferli eineltismála á vinnustað - og ferli ofbeldismála af hendi nemenda í garð kennara sem er að finna á heimasíðu Kennarasambands Íslands www.ki.is.
Hægt er að velja á milli óformlegrar eða formlegrar málsmeðferðar.
Óformleg málsmeðferð
Slík málsmeðferð felur í sér að leitað er upplýsinga hjá þolanda og honum veittur stuðningur með trúnaðarsamtali eða ráðgjöf. Aðrir innan vinnustaðarins eru ekki upplýstir um málið.
Formleg málsmeðferð
Gerð er hlutlaus athugun á málsatvikum. Rætt er við þolanda, geranda og aðra sem veitt geta upplýsingar um málið. Mikilvægt er að leita upplýsinga um tímasetningar og fá fram gögn ef einhver eru, s.s. tölvupósta, sms-skilaboð eða annað.
Fundin verður lausn sem m.a. getur falist í breytingum á vinnustaðnum, vinnubrögðum eða vinnuskipulagi. Gerandi mun fá leiðsögn og áminningu.
Málinu verður fylgt eftir og rætt við aðila þess að ákveðnum tíma liðnum. Fylgst verður með samskiptum aðila málsins.
Láti gerandi ekki segjast og viðheldur eineltinu getur það leitt til uppsagnar hans úr starfi.
2.2.8.15 Endurskoðun starfsmannastefnu
Starfsmannastefna skólans skal sæta endurskoðunar kennarafundar a.m.k. árlega.
2.2.9 Forvarnarstefna
Skólinn mun stuðla að heilbrigðum lífsháttum nemenda sinna. Hann leitast við að efla áhuga þeirra á lífi án áfengis, tóbaks og annarra vímuefna.
Markmiðum þessum hyggst skólinn ná með því að:
1. veita forvarnarfræðslu fyrir nemendur, aðstandendur þeirra og starfsmenn skólans.
2. leitast við að flétta forvarnir í kennslu og félagsstarf skólans.
3. sjá nemendum fyrir viðfangsefnum sem stuðla að jákvæðri sjálfsmynd, sjálfsvirðingu og sjálfsaga.
4. með því að kynna starfsfólki og nemendum skýrar reglur um umgengni og hegðun gagnvart ávana- og fíkniefnum og framfylgja viðurlögum við brotum á þeim.
5. gera sérstaka stuðningsáætlun fyrir ungmenni í áhættuhópi.
6. taka þátt í samstarfi við aðila utan skólans sem sinna forvarnastarfi,
7. hafa stefnu skólans í forvörnum í stöðugri endurskoðun.
2.2.10 Áætlun skólans um áherslur í starfi fyrir tímabilið 2004-2007
- til umfjöllunar í starfsmannaviðtölum skólameistara.
2.2.10.1 Markmið:
Með starfsemi skólans er stefnt að því:
1. Að tryggja nemendum;
a) greiða leið frá upphafi náms á framhaldsskólastigi til loka þess.
b) breitt námsframboð sem taki mið af eftirspurn nemenda og samfélags.
c) vandaða kennslu sem nýtist þeim sem haldgóður undirbúningur til áframhaldandi náms í sérskólum, háskólum og til starfa í atvinnulífi en jafnframt í daglegu lífi og tómstundum.
2. Að veita nemendum skólans tækifæri til að tileinka sér jákvæð gildi til leiðsagnar í mannlegum samskiptum sem taki mið af samfélagshollustu og lýðræðishugsjónum. (Gildishlaðin nemendamenning). Meðal annars verður efld eftirfylgni við reglur skólans og þær endurskoðaðar fyrir hverja önn með tilliti til reynslu (árangurs) sem skólinn aflar sér.
3. Að sinna þörfum atvinnufyrirtækja, stofnana, sveitarfélaga og íbúa Norðurlands vestra fyrir fræðslu og fjölbreytta starfsemi (námsframboð, fjöldamóttökustöð, félagsstarf).
4. Að ná markmiðum ríkisvalds í fjármálastjórnun og hallalausum rekstri.
2.2.10.2 Veikleikar
1. Skortur á húsnæði fyrir sérgreinar.
2. Skortur á gildishlöðnum jákvæðum hefðum.
3. Samvinna starfsmanna skólans er ekki nægjanlega mikil.
4. Brottfall er of mikið þrátt fyrir sýnilegan árangur frá árinu 2003.
5. Fjárveitingar vegna annarra starfsmanna en kennara, til rekstrar og til búnaðarkaupa eru ekki í námunda við þarfir skólans. Þar munar meiru en halla skólans, sbr. skýrslu menntamálaráðuneytis frá því í júní 2003 um rekstur sjö framhaldsskóla en þar segir m.a.: „Skólinn er kominn í rekstrarþrot og mun veslast upp við mannskemmandi aðstæður stjórnenda, nemenda og alls skólasamfélagsins, þar með talin slæm áhrif á sveitarfélagið“. (Úr skýrslu menntamálráðuneytis).
6. Of fáir nemendur miðað við námsframboð.
2.2.10.3 Styrkleikar
1. Starfsandi og samskipti starfsfólks.
2. Skipulag skólans (Áfangakerfi,skólanámskrá)
3. Námsráðgjöf.
4. Bókasafn.
5. Heimavist.
6. Tölvuvæðing (þráðlaus nettenging nemenda og kennara).
7. Félagslíf nemenda.
8. Hátt hlutfall réttindakennara.
9. Samningur á milli menntamálaráðuneytis, fjármálaráðuneytis og skólans til þriggja ára til að styrkja fjárhagsgrundvöll skólans og aðlaga starfsemi að fjárveitingum.
2.2.10.4 Leiðir með viðvarandi viðleitni til betrumbóta
1. að finna námsframboð sem er rekstrarhæft við skólann og hefur enn ekki verið boðið fram. Sérstaklega skal stefnt að stofnun eftirfararandi námsframboða þegar forsendur gefa tilefni til: a) bifvélavirkjun b) viðbótarréttindanám á vélstjórnarbraut fyrsta og annars stigs. c) smíðadeild fyrir plastsmíði og trefjasmíði d) hönnunarbraut e) námsbrautir í skrifstofustörfum og viðskiptagreinum s.s. skrifstofubraut, verslunarbraut og þjónustugreinar, f) hagnýtt lífsleikninámsframboð verði skipulagt með nýjungum í útivistargreinum svo sem hestamennsku, rafting, björgunarsveitagreinum og slysavörnum. g) frumgreinadeildir í samvinnu við háskóla
2. að efla notkun samskipta- og kennsluforritsins Moodle fyrir fjarnema og dagskólanemendur.
3. að efla aðgengi nemenda að upplýsingabönkum og færni þeirra til að nýta sér tölvutækni til þekkingarleitar og æfinga. Þá skulu gerð gagnvirk kennsluforrit með Moodle og leitað samvinnu við aðra um það. Sótt skal um þróunarstyrki til verkefnisins
4. að kynna kosti skólans fyrir íbúum Norðurlands vestra með beinum og óbeinum hætti. Sérstök kynning verði á heimasíðu skólans og gefið út sérstakt kynningarrit um skólann og það endurskoðað ár hvert. Auk þess verður farið í heimsóknir í grunnskóla kjördæmisins og leitað eftir samvinnu við aðra um kynninguna. Sérstök áhersla skal lögð á að nýta FNV -daginn til þessa.
5. að veita nemendum og starfsmönnum skólans betri aðstöðu til starfa m.a. með stækkun verknámshúss og bættri aðstöðu til kennslu raungreina.
6. að leita eftir samvinnu við aðila utan skólans, stjórnmálamenn og aðra áhugamenn um velferð skólans, um að leita leiða til að byggja megi hina nýju heimavist en bygginganefndarteikningar liggja fyrir eða að bæta verulega gömlu vistina.
7. að vinna næstu misseri áfram skv. fyrirliggjandi sjálfsmatsáætlun sem nær til allra þátta skólahaldsins. Sjálfsmatsnefnd skólans skal hafa að leiðarljósi hagnýt not hennar fyrir skólahaldið og jafnframt að uppfylla formlegar kröfur ráðuneytis og skólanámskrár.
8. að framkvæma kennsluháttagreiningu reglulega og gera skal áætlun um að fjölga tækifærum kennara til að tileinka sér fjölbreytni í kennsluháttum til að ná enn frekar markmiðum skólans. Jafnframt skal koma á virku skipulagi á samvinnu kennara um vettvangsaðstoð (sbr. Techniques in the Clinical Supervision of Teachers: Keith A. Acheson og Meredith Damien Gall). Námsáætlanir verði endurskoðaðar í þessu ljósi. Loks verði leitað leiða til að fá fyrirlesara og námskeiðahald til skólans til að styrkja endurmenntun kennara.
9. að gera framkvæmdaáætlun fyrir hvert svið skólans til að stemma stigu við brottfalli nemenda frá námi og endurskoða í lok hverrar annar með tilliti til árangurs. Skal stefnt að því að minnka brottfallið. Þróa skal áfram lotukerfi sem upp var tekið að finnskri fyrirmynd vorið 2004 og endurskoðað var á haustönn 2006.
10. að efla samstöðu nemenda skólans.
skipulagt verði verkefni fyrir félagslíf og samheldni heimavistarbúa og annað á svipuðum nótum fyrir nýnema. Félagsmál nemenda verði endurskoðuð í þessu skyni í anda væntanlegra breytinga á lögum. Efld verður söng- og dansmennt meðal nemenda. Leitað verður eftir auknu samstarfi við Tónlistarskólann á Sauðárkróki í þessu skyni. Athugað verði að tengja sönglagatexta við námsefni erlendra tungumála. Efnt verður til samkeppni um skólasöng á árinu 2009.
11. að efla stjórnun skólans
Farið verði yfir verkaskiptingu og starfslýsingar allra stjórnenda, millistjórnenda annarra starfsmanna og boðskiptaleiðir innan skólans endurskoðaðar. Skólanámskrá er á heimasíðu skólans og skal endurskoðuð og uppfærð á hverju skólaári. Valddreifingu verði komið á þar sem hentar að mati millistjórnenda og skólameistara.
12. að auka eftirlit með nemendum og leiðsögn.
Komið verði á vettvangsaðstoð meðal nemenda. Í því skyni verði skipulagður sérstakur mentor-áfangi sem metinn verður til eininga fyrir leiðbeinendur. Farið verði yfir eftirlitskerfi með námsgengi, fjarvistum og velferð nemenda og heimavistarreglur endurskoðaðar.
13. Setja á stofn dreifinám/fjarnám á landsvísu.
14. að gera fjárhagsáætlun til þriggja ára í senn, rekstaráætlun og greiðsluáætlun sem stefni að hallalausum rekstri skólans og því meginmarkmiði að ná að eyða halla fyrri ára innan þriggja ára. Skulu áætlanir og reikningar bornir saman með reglulegum hætti og gripið til viðeigandi ráðstafana ef eitthvað fer úr skorðum.
15. Efla enn frekar samstarf við fyrirtæki í atvinnurekstri á Norðurlandi vestra um uppbyggingu náms sem þjóni hagsmunum atvinnuveganna.
16. Endurskipuleggja skal námsmatið þar sem því má við koma og reynt að gera það meira ummótandi í kennslu en verið hefur í því augnamiði að auka árangur nemenda í námi. Verður lögð fram umsókn um styrki til að unnt verði að standa að þessu með fullum sóma.
17. Efna skal til samvinnu við aðra skóla til að búa til víðtækt sjálfsmatskerfi sem tekur þvi fram sem skólinn notast við.
18. Stefnt verði að upptöku viðeigandi ISO-staðals í skólahaldinu innan 3ja ára.
19. Stofnað verði foreldrafélag við skólann fyrir foreldra og aðstandendur ólögráða nemenda fyrir haustið 2008.
20. Byggður verði II-áfangi verknámshúss fyrir árið 2009.
Sauðárkróki 31. janúar 2008
Jón F. Hjartarson.
2.3 Skólahúsnæði
2.3.1 Kennsluhúsnæði
Verknámshús var tekið í notkun 1983 og Bóknámshús 1994. Bókleg kennsla fer fram í Bóknámshúsi skólans en kennsla á málmiðnabraut, í grunndeild rafiðna og grunnnám bygginga og mannvirkjagreina fer fram í Verknámshúsi. Tölvuver eru Bóknámshúsi skólans til afnota fyrir nemendur eftir aðstæðum og eru nemendur hvattir til að notfæra sér auglýsta æfingatíma. Að auki eru tölvur á bókasafni, heimavist og í Verknámshúsi skólans til afnota fyrir nemendur. Þráðlaust skólanet er til staðar í öllu húsnæði skólans þ.á.m. á heimavist.
2.3.2 Heimavist
Við skólann er starfrækt heimavist sem rúmar 142 nemendur á aðalvist. Á aðalvistinni, sem staðsett er rétt norðan Bóknámshúss, er mötuneyti skólans. Herbergin eru flest tveggja manna með salerni og sturtu.
2.3.3 Íþróttahús
Íþróttahúsið er staðsett við hlið heimavistarinnar sem og allt íþróttasvæði bæjarins.
2.4 Starfsmenn
2.4.1 Skólameistari
1. ber ábyrgð á starfsemi skólans, innritun nemenda, menntunar- og uppeldishlutverki skólans, þróunarstarfi innan hans, eignum, fjárreiðum og öllum rekstri,
2. fer með yfirumsjón heimavistar og vistarstjóri í umboði hans,
3. sér um að lögum, reglugerðum og námskrá sé fylgt,
4. sér um tengsl skólans við þá er láta sig störf hans varða, t.d. aðstandendur nemenda, yfirvöld og aðila á öðrum sviðum atvinnulífsins.
2.4.2 Aðstoðarskólameistari
1. er staðgengill skólameistara og vinnur með honum við daglega stjórn skólans og rekstur,
2. hefur umsjón með kennslu og skipulagningu hennar, svo og mati á námi og kennslu, innra
eftirliti og gæðastjórnun,
3. starfar með áfangastjóra að gerð stundaskráa, framkvæmd prófa og úrvinnslu einkunna,
4. sér um miðlun upplýsinga til nemenda skólans og uppfærslu skólanámskrár,
5. hefur umsjón með framhaldsdeildum sem við skólann eru starfræktar hverju sinni og samskipti við grunnskóla,
6. sinnir rannsóknar-, gæða- og framfarastörfum í þágu skólans,
7. hefur umsjón með fjarvistaskráningu,
8. hefur yfirumsjón með útleigu og láni á húsakynnum skólans og annarri notkun sem ekki heyrir undir daglegt skólastarf.
2.4.3 Áfangastjóri
1. hefur umsjón með rekstri áfangakerfis og námsframboði,
2. hefur umsjón með námsferilsskráningu, mati frá öðrum skólum, gerð stundaskráa, prófum og úrvinnslu einkunna,
3. hefur umsjón með námsvali í samráði við umsjónarkennara og námsráðgjafa.
2.4.4 Námsráðgjafi
1. liðsinnir nemendum í einkamálum er snerta skólavist þeirra og veitir þeim ráðgjöf um náms- og starfsval.
2. stendur vörð um velferð nemenda, styður þá og liðsinnir þeim í málum er varða nám þeirra og skólavist, framhaldsnám og starfsval,
3. veitir einstaklings- og hópráðgjöf sem miðar að því að aðstoða einstaklinga við að standast kröfur skólans og ná settu marki í námi sínu,
4. veitir upplýsingar um nám og námsmöguleika og kynnir námsleiðir og störf,
5. veitir ráðgjöf um námstækni og skipulögð vinnubrögð,
6. er talsmaður nemenda gagnvart skólayfirvöldum,
7. tekur þátt í að sinna málefnum fatlaðra nemenda innan skólans í samvinnu við sérkennara,
8. leggur fyrir lesskilningspróf eftir þörfum,
9. hefur milligöngu um aðstoð sérfræðinga fyrir nemendur með leshömlun og aðrar sérþarfir,
10. heldur skrá um nemendur með sérþarfir og kemur ábendingum til kennara og stjórnenda þar að lútandi,
11. vísar málum áfram til sérfræðinga þegar ástæða er til.
2.4.5 Umsjón með nemendum
Í 8. gr. reglugerðar um framhaldsskóla segir m.a. að kennari:
a. sinni skráningu fjarvista nemenda sinna,
b. hafi tiltekinn viðtalstíma fyrir nemendur, forráðamenn og vegna upplýsingagjafar,
c. sitji a.m.k. einn fund á ári / önn með forráðamönnum ólögráða nemenda.
2.4.5.1 Frá haustönn 2002 er starfandi verkefnisstjóri umsjónar sbr. eftirfarandi starfslýsingu:
1. Verkefnisstjóri umsjónar safnar upplýsingum um námsgengi nemenda, ástundun þeirra og framgöngu í námi, vellíðan í skóla, skólasókn og samskipti þeirra við aðra. Þessar upplýsingar notar hann í samvinnu við foreldra, nemendur, kennara, námsráðgjafa, heimavistarstjóra, skólahjúkrunarfræðing og stjórnendur skólans.
2. Hann gerir foreldrum eða forráðamönnum ólögráða nemenda viðvart ef eitthvað er athugavert við ofangreinda þætti og leitar samvinnu við þá, námsráðgjafa, kennara og skólastjórnendur og nemendur um úrbætur. Hann veitir nemendum skriflega viðvörun ef skólasókn þeirra er ónóg og tilkynnir um úrsögn úr áfanga er ástæða er til þess.
3. Hann kallar nemendur til viðtals eftir ábendingum kennara og hefur samráð og samvinnu við námsráðgjafa.
4. Hann samræmir störf annarra starfsmanna skólans sem sinna umsjón með nemendum og heldur fundi með þeim er þörf krefur.
5. Hann situr fundi skólasráð er málefni nemenda eru á dagskrá.
6. Hann skilar skýrslu um störf sín og tekur saman upplýsingar um hagi nemenda.
Nemendur geta pantað viðtal við verkefnisstjóra umsjónar á skrifstofu skólans á auglýstum viðtalstímum. Þeir sem eru í kennslustundum á þessum tímum geta sótt um leyfi til viðkomandi kennara til að fara í viðtal. Þessar fjarvistir færast ekki í fjarvistabókhald.
2.4.5.2 Samskiptareglur fyrir kennara
1. Kennara ber að hafa hagsmuni nemenda að leiðarljósi, efla sjálfsmynd þeirra og sýna hverjum og einum virðingu, áhuga og umhyggju.
2. Kennara ber að hafa jafnrétti allra nemenda að leiðarljósi.
3. Kennara ber að hafa samvinnu við forráðamenn eftir þörfum. Telji hann aðstæður nemenda athugaverðar ber honum að gera viðvart þeim er málið varðar.
4. Kennara ber að gæta trúnaðar við nemendur og virða þann trúnað sem nemendur sýna honum.
5. Kennara ber að gæta þagmælsku um einkamál nemenda og forráðamanna þeirra sem hann fær vitneskju um í starfi. Þó er kennara heimilt að veita samstarfsaðilum upplýsingar telji hann það til góðs fyrir nemendur.
6. Kennara ber að gæta hlutlægni þegar mál er varðar þriðja aðila ber á góma í viðtölum.
2.4.6 Fagstjórar
Við FNV starfa 17 fagstjórar. Þeir eru í sérgreinum tréiðna, rafiðna, málmiðna, sjúkraliða og starfsbrautar, dönsku, ensku, félagsfræði, frönsku, íþróttum, íslensku, raungreinum, sögu, sálfræði, stærðfræði, viðskiptagreinum og þýsku.
2.4.6.1 Starfslýsing fagstjóra
Fagstjóri
1. vinnur að stefnumótun og þróun faglegs starfs í þeim greinum sem undir hann heyra í samvinnu við yfirstjórn skólans. Hann skipuleggur faglegt samstarf í kennslugreinum sem undir hann heyra og annast eftirlit með framkvæmd starfa samkv. 7. og 8. gr. reglugerðar um starfslið framhaldsskóla, að svo miklu leyti sem það á við.
2. Stýrir faglegu samstarfi þeirra kennara sem undir hann heyra, boðar þá til samráðsfunda um málefni greina og greinaflokka.
3. Leggur tillögur fyrir skólameistara að kennsluskiptingu að höfðu samráði við kennara sem undir hann heyra.
4. Ákveður námsefni og kennslugögn, skráir bókalista í Innu, sér um að námsáætlanir séu gerðar og er kennurum til leiðsagnar um gerð kennsluáætlana.
5. Ber ábyrgð á samræmingu á námsmati, prófagerð og yfirferð prófa.
6. Gerir skýrslu um starfið í lok annar.
7. Gerir tillögur til stjórnenda skólans um kaup á kennslutækjum.
8. Er skólameistara til ráðgjafar í ráðningarmálum nýrra kennara.
9. Leitar sátta í ágreiningsmálum milli kennara eða kennara og nemenda. Náist ekki sættir skal ágreiningsmálum skotið til skólameistara.
10. Tekur á móti nýjum kennurum í faginu og veitir þeim leiðsögn.
11. Stuðlar að samstarfi og samvinnu við aðila utan skólans.
12. Vinnur að gerð kynningarefnis fyrir skólann.
2.4.6.1.1 Leiðbeinandi verklagsreglur um dagleg störf kennara á verknámsbrautum
Markmið: Að gera verkaskiptingu skýra og auðvelda dagleg samskipti.
1. Fagstjóri hefur með höndum daglega yfirumsjón með málefnum brautar og starfar samkvæmt erindisbréfi í umboði skólameistara. Allar tillögur um breytingar á starfsemi brautarinnar skulu lagðar fyrir fagstjóra.
2. Fyrir upphaf hverrar annar skulu fagstjóri og kennarar fara yfir námsgögn einstakra áfanga sem þeir kenna á önninni með það að leiðarljósi að samræma áherslur og gera nauðsynlegar breytingar.
3. Fagstjóri getur falið kennurum sem starfa við brautina að sjá um daglega umsjón og viðhald á tækjabúnaði og innkaup á rekstrarvörum í þeim áföngum sem þeir kenna, enda komi til umsamin greiðsla fyrir þau störf skv. samningum samstarfsnefndar.
4. Fagstjóri leggur áherslu á að allir starfsmenn brautarinnar leggi sitt af mörkum til þróunarstarfs og leggi fyrir sig tillögur um nýjungar og nýsköpun í starfsemi brautarinnar.
5. Taki kennari/starfsmaður deildarinnar að sér að vinna verkefni fyrir aðrar deildir eða aðila innan veggja skólans utan vinnutíma er honum heimilt að nota búnað deildarinnar án samráðs við fagstjóra, enda sé þess gætt að enginn kostnaður því samfara falli á deildina.
6. Fagstjóri leggur áherslu á að starfsmenn brautarinnar vinni sem ein liðsheild og taki mið af heildarhagsmunum brautarinnar í daglegum störfum og kynni sér málefni allra þátta starfseminnar.
7. Starfsmenn brautarinnar skulu eiga samráð við fagstjóra um skipulag kennslunnar í kennslustundum.
8. Kennarar skulu vinna saman að kynningu og gerð kynningarefnis fyrir hverja braut og samræma störf sín við kennara annarra brauta.
2.4.7 Verkefnisstjórn
Við FNV starfa verkefnisstjórar í félagsmálum nemenda, innra mati skólans og heimasíðu skólans.
2.4.7.1 Félagsmál nemenda
Starfslýsing verkefnisstjóra félagsmála nemenda:
1. Hann situr fundi stjórnar Nemendafélagsins og aðstoðar nemendur í skipulagningu og uppbyggingu gildishlaðinnar nemendamenningar
2. Hann annast miðlun upplýsinga milli stjórnenda skólans og nemenda.
3. Hann beitir sér fyrir að reglur skólans séu virtar í ferðum nemenda sem skipulagðar eru á vegum skólans og í hans nafni og á öllum samkomum skólans.
4. Hann fylgist með bókhaldi nemendafélagsins og gætir þess að það sé fært að kröfum fjárhaldsmanns skólans.
5. Hann tekur saman yfirlit um störf Nemendafélagsins fyrir hverja önn.
2.4.7.2 Verkefnisstjóri skólanámskrár
Starfslýsing:
1. Hann undirbýr skólanámskrá skólans í samvinnu við stjórnendur og fagstjóra og hefur yfirumsjón með ritun hennar.
2. Hann fylgist með skólanámskrám annarra skóla og kynnir þær innan skólans.
3. Hann á samstarf við aðra starfsmenn skólans um hönnun og framsetningu skólanámskrár á heimasíðu skólans og annast endurskoðun á skólanámskrá í samvinnu við stjórnendur og fagstjóra.
2.4.7.3 Verkefnisstjóri sjálfsmats
Starfslýsing:
Fjölbrautaskóli Norðurlands vestra er í formlegu samstarfi (SAMNOR) við aðra framhaldsskóla á Norðurlandi sem hafa látið vinna á sínum vettvangi sjálfsmatslíkan fyrir framhaldsskóla, Framhalds-Skólarýni, sem Benedikt Sigurðarson tók saman. Skal unnið að sjálfsmati skólans á þeim grunni en jafnframt skal hugað að aðlögun þessa kerfis að þörfum skólans.
1. Verkefnisstjóri vinnur að gerð sjálfsmatsáætlunar fyrir hverja önn með hliðsjón af aðalnámskrá, Framhaldsskólarýni, skólanámskrá og fyrirliggjandi langtímaáætlun.
2. Verkefnisstjóri aðstoðar starfsmenn skólans við einstök verkefni og verkþætti við sjálfsmatið, t.d. fyrirlagningu kennara á viðhorfakönnunum í einstökum námsáföngum, fyrirlagningu á könnunum á meðal starfsfólks um hvaðeina sem snertir nám, kennslu, skólaanda o.þ.h.
3. Þá vinna verkefnisstjórar með öðrum sjálfsmatsnefndarmönnum við að greina niðurstöður og gera umbótaáætlanir á grundvelli þeirra.
2.4.7.4 Verkefnisstjóri heimasíðu FNV
Starfslýsing:
1. Umsjónarmaður sér um viðhald, endurbætur og uppfærslur á heimasíðu skólans. Hann fylgist með nýjungum og gerir heimasíðuna notendavæna, aðlaðandi og einfalda í notkun.
2. Hann undirbýr uppfærslu heimasíðu skólans í samvinnu við stjórnendur og fagstjóra og hefur yfirumsjón með ritun hennar.
3. Hann fylgist með heimasíðum annarra skóla.
4. Hann á samstarf við aðra starfsmenn skólans um hönnun og framsetningu heimasíðu.
2.4.8 Kennarar
Kennarar skipuleggja starf sitt með hliðsjón af markmiðum námsins og þroska og þörfum nemenda. Þeir fylgjast með í greininni, stuðla að þróun hennar, sjá um að meta nám og huga að tengslum við aðrar greinar, taka þátt í samstarfi um starf og stefnu skólans og starfa með öðrum kennurum skólans að sameiginlegum viðfangsefnum.
Kennarar annast, taka þátt í og bera ábyrgð m.a. á eftirfarandi:
1. kennslu, undirbúningi, faglegu samstarfi og mati náms í kennslugreinum sínum skv. markmiðum skóla- og aðalnámskrár,
2. gerð kennsluáætlana og prófa í samstarfi við aðra kennara,
3. að viðhalda faglegri hæfni sinni og huga að tengslum við aðrar námsgreinar,
4. skráningu fjarvista nemenda sinna
5. samstarfi vegna starfs síns,
6. almennri upplýsingagjöf og upplýsingagjöf vegna sjálfsmats skóla og skólanámskrár,
7. að hafa tiltekinn viðtalstíma fyrir nemendur, forráðamenn og vegna upplýsingagjafar,
8. að sitja a.m.k. einn fund á ári/önn með forráðamönnum ólögráða nemenda,
9. að sitja kennarafundi sem boðaðir eru skv. reglugerð um kennarafundi,
10. að kynna sér skólanámskrá til og hafa hana til leiðbeiningar í störfum sínum.
2.4.9 Heimavistarstjóri
Heimavistarstjóri annast í umboði skólameistara, sem er næsti yfirmaður hans, daglegt eftirlit með nemendum á heimavist og sér til þess að reglum heimavistar sé framfylgt.
Verksvið hans er :
1. Vistarstjóri annast daglegt eftirlit með íbúum heimavistar í samræmi við Heimavistarreglur Fjölbrautaskóla Norðurlands vestra og aðrar reglur sem um heimavistina gilda. Vistarstjóri hefur daglegt samband, ef þörf krefur, við skólameistara vegna þessara eftirlitsstarfa og gerir honum grein fyrir umgengni nemenda og hegðan.
2.Vistarstjóri skal fara reglulegar eftirlitsferðir um heimavistina, einkum á næðistímum, og sjá um að reglum um góða umgengni sé framfylgt í hvívetna. Vistarstjóri skal fara inn á hvert herbergi einu sinni í viku og kanna ástand þess og þrif. Skal nemendum gerð sérstök grein fyrir hvernig að því er staðið.
3.Vistarstjóri hefur fasta viðtalstíma fyrir heimavistarbúa og leitar aðstoðar fyrir þá í persónulegum málum, ef honum þykir ástæða til, í samráði við skólameistara og námsráðgjafa.
4. Vistarstjóri annast eftirlit með húsum heimavistar og gerir tillögur til skólameistara um breytingar, endurbætur, viðgerðir og viðhald á húsum í samvinnu við húsvörð skólans. Vistarstjóri aðstoðar við frágang vistarinnar í lok vorannar og við undirbúning haustannar.
5. Vistarstjóri sinnir minni háttar viðgerðum í húsum heimavistar s.s. á hurðum, gluggum, stólum, borðum og vöskum eftir nánari fyrirmælum frá skólameistara.
6. Vistarstjóri skal hafa samvinnu við yfirmann mötuneytis og starfsmann þvottahúss um sameiginleg mál.
7. Vistarstjóri annast verkstjórn og umsjón með heimavistarliðum.
8. Vistarstjóri annast snjómokstur og umhirðu lóðar heimavistar.
9. Vistarstjóri á sæti í heimavistarstjórn og heimavistarráði.
2.4.10 Heimavistarliðar
Starfið felst í almennri ræstingu á heimavist og þjónustu við nemendur undir verkstjórn heimavistarstjóra. Þeim ber að halda heimavistinni hreinni og sinna þeim þrifum sem heimavistarstjóri telur nauðsynleg á meðan skóli starfar. Þar með er talið tilfallandi þrif vegna óhappa eða mistaka nemenda eða annarra hvort sem það er á herbergjum nemenda eða annars staðar á heimavistinni. Þeim er ætlað að vinna að mótun verkskipulags á vinnutíma sínum í samvinnu við heimavistarstjóra. Auk þess sinna þeir gangavörslu og minni háttar þjónustu við nemendur svo sem að opna herbergi og kalla til heimavistarstjóra eftir atvikum. Heimavistarliði hefur eftirlit og tilsjón með umgengni nemenda og að þeir fylgi vistarreglum í hvívetna samkvæmt umboði skólameistara. Þá hefur heimavistarliði til hliðsjónar meðfylgjandi atriðalista yfir verkþætti ræstingar og vinnur að þeim eins og vinnutími leyfir undir stjórn heimavistarstjóra. Heimavistarliðar vinna að aðalhreingerningum á heimavistarhúsnæði í skólahléum svo sem í annarlok.
Vinnutími er 50% á ári eða 1040 klukkustundir sem dreifast með hliðstæðum hætti á skólaárið og störf kennara.
2.4.11 Bókavörður
Bókasafnsfræðingur er forstöðumaður bókasafns.
1. Hann hefur umsjón með daglegum rekstri bókasafnsins, bókakosti, geisladiskum, myndböndum og öðrum safnkosti og lestrarsölum.
2. Hann kennir nemendum og kennurum safnnotkun og starfar með þeim að verkefnum sem krefjast sérstakrar þjónustu bókasafnsins.
3. Hann tekur saman bókalista frá kennurum og sér um að bókapantanir séu gerðar tímanlega fyrir upphaf hverrar annar.
2.4.12 Umsjónarmaður tölvumála FNV.
1. Sér um uppsetningu, viðhald og umsjón með tölvubúnaði FNV.
2. Gerir tillögur til yfirstjórnar skólans um tölvubúnað og staðsetningu hans.
3. Aðstoðar starfsmenn vegna vandamála við tölvunotkun.
4. Hefur samskipti við þá sem veita FNV tölvuþjónustu, aðrar stofnanir og ráðuneyti.
5. Sér um að tölvukerfi FNV sé í starfhæfu ástandi og tryggir öryggi gagna.
6. Sér um varahlutakaup.
7. Sér um að senda og heimta tæki frá þjónustuaðilum.
8. Skal hafa kerfislega yfirsýn yfir vefsvæði skólans og veitir starfsmönnum aðstoð við að hagræða gögnum sem þar eiga heima.
9. Sér um að uppfræða starfsmenn um nýjungar og þróunarvinnu í tölvumálum.
10. Skal leita samþykkis skólameistara fyrir fjárskuldbindingum skólans.
11. Virðir þagnarskyldu.
12. Sér um uppsetningu og viðhald á öryggis- og eftirlitsmyndavélum og öðrum rafrænum búnaði skólans.
2.4.13 Fjárhaldsmaður
Fjármálastjóri annast fjárreiður skólans, bókhald, greiðslu reikninga og innheimtu. Nemendur snúa sér t.d. til fjárhaldsmanns varðandi greiðslur vegna heimavistar og mötuneytis.
2.4.14 Skólafulltrúar
Skólafulltrúar starfa á skrifstofu skólans og annast öll dagleg skrifstofustörf, símavörslu, útgáfu vottorða, innheimtu gjalda í samráði við fjármálastjóra, afgreiðslu námsstyrkja og fleira. Skrifstofan er opin á skólatíma kl. 08:00-12:00 og 13:00-16:00.
2.4.14.1 Fulltrúi 1:
1. sér um útskrift reikninga vegna skólagjalda og gíróseðla og uppgjör á kassa.
2. sér um fundargerðir og er fundarritari skólanefndar
3. sér um skýrslugerð vegna kennararáðninga og kennslu.
4. heldur bókhald yfir utanskólanemendur.
5. færir niðurstöður prófa
6. sér um bókhald heimavistar
7. aðstoðar skólameistara og fjárhaldsmann við bókhald skólans
2.4.14.2 Fulltrúi 2:
1. sér um kennarabókhald, tímaskráningu og annast undirbúning kennaraafleysinga,
2. vinnur að nemendabókhaldi,
3. sér um afgreiðslu námsstyrkja,
4. sér um skráningu valáfanga nemenda
5. annast fjölföldun prófa
6. annast bókhald fyrir kennsluáætlanir
2.4.14.3 Sameiginleg vinna er m.a.:
1. almenn skrifstofustörf, innkaup á skrifstofu- og ljósritunarvörum
2. að sjá um skráningu nemenda og innheimtu skólagjalda, sölu bóka til nemenda, endursendingu óseldra bóka og símavörslu.
3. að halda bók um notkun á salarkynnum skólans utan daglegs starfstíma skólans.
4. að sjá um útgáfu vottorða vegna atvinnuleysisbóta, orflofs og skattaframtala
5. að sinna þörfum framhaldsdeilda og grunnskóla
2.4.15 Húsvörður
1 . Húsvörður hefur umsjón með öllu húsnæði skólans , áhöldum og munum sem notaðir eru í þágu skólans, útlánum á húsnæði og húsmunum, viðhaldi lyklakerfis, dyravörslu, ræstingu, ljósum og hita og annast eftirlit lóða skólans og hirðingu þeirra, þar með talinn snjómokstur og að sjá til þess að greið aðkoma sé að skólanum fyrir gangandi vegfarendur og sjúkra- og slökkvibifreiðar.
2. Húsvörður skal sjá um að opna hús skólans tímanlega hvern kennsludag og sjá til þess að húsnæði sé tilbúið til kennslu þegar til á að taka. Þá skal hann kveikja á tilkynningaskjám að morgni og slökkva á þeim í lok skóladags.
3. Húsvörður skal hafa frumkvæði að því að snyrtilegt sé umhorfs í húsum skólans og á lóðum þeirra.
4. Húsvörður skal hafa eftirlit með raf-, hita- og vatnslagnakerfi og kalla til viðgerðarmenn þá nauðsyn krefur. Hafa skal samráð við skólameistara um meiriháttar viðhaldsvinnu.
5. Húsvörður skal vinna tilfallandi störf við viðhald, þar á meðal:
lagfæring á húsgögnum,
skipti á ljósaperum,
minni háttar lagfæringar á vatnslagnakerfi,
lagfæringar á dyraumbúnaði, skrám, gluggaumbúnaði og þau störf, sem ekki krefjast sérstakrar fagþekkingar.
6. Húsvörður sér um að önnur tilfallandi viðhaldsvinna sé unnin, viðgerðir og endurbætur, skipt sé um brotin gler í hurðum og gluggum o.þ.h. Hann hefur eftirlit með þessari vinnu eftir því sem þörf krefur.
7. Húsvörður skal annast innkaup á vörum til ræstinga og minni háttar viðhalds í samráði við skólameistara eða fjármálastjóra.
8. Húsvörður annast verkstjórn og umsjón með ræstingu. Hann sér til þess að ræstingafólk geti gengið að áhöldum sínum og efnum. Húsvörður skipuleggur vinnu við ræstingu. Húsvörður ræður ræstingafólk til starfa í samráði við skólameistara og auglýsir skal störf við ræstingu.
9. Húsvörður heldur skrá um viðhaldsvinnu og ástand húsnæðis, lýsingar o.þ.h. Einnig skal hann sjá til þess að starfsmenn geti á einum stað komið ábendingum á framfæri um ástand húsnæðis og nauðsynlegar endurbætur.
10. Húsvörður annast frágang á húsum skólans vegna samkomuhalds sem er á hans vegum. Halda skal bók um notkun á salarkynnum utan daglegs starfstíma skólans. Slík störf í þágu annarra, sem fá lánuð eða leigð húsakynni skólans, skal vinna í samkomulagi viðþá.
11. Húsvörður annast sendiferðir fyrir skólann, sækir og afhendir póst, böggla og póstkröfur.
12. Húsvörður skal fyrir 1. apríl ár hvert gera tillögur um meiriháttar viðhaldsvinnu í skólanum og húsum hans til skólameistara.
13. Húsvörður sér um og skipuleggur aðalhreingerningu ár hvert.
14. Húsvörður innir dagvinnu sína af hendi frá kl. 7.30 – 16.30 alla virka daga, og er þar í klukkustundar hádegishlé. Leyfi nemenda teljast ekki frídagar í þessu tilliti.
15. Að lokinni kvöldkennslu og/eða starfsemi að kvöldi til á vegum nemendafélags virka daga skal húsvörður fara lokunar- og eftirlitsferð um húsakynni skólans.
16. Utan hins daglega fasta vinnutíma er húsverði skylt að sinna eftirliti eða útköllum, sem nauðsynleg kunna að vera vegna ófyrirséðra atvika, svo sem bilunar á veitukerfi, fárviðra, rúðubrota, innbrota eða annarra svipaðra atburða.
17. Sumarleyfi húsvarðar ákvarðast í samráði við skólameistara.
2.4.16 Starfsfólk í mötuneyti
1. Forstöðumaður hefur umsjón með öllum rekstri mötuneytis og ræstingu matsalar.
2. Hann annast skipulagningu og skiptingu starfa í mötuneyti.
3. Hann annast innkaup matfanga.
4. Hann ber ábyrgð á að gætt sé vandvirkni við öll störf.
5. Hann ber ábyrgð á að kröfur um hollustuhætti séu uppfylltar.
6. Hann á sæti í vistarstjórn og vistarráði þegar málefni mötuneytis er á dagsrá,
7. Hann fylgist með nýjungum í greininni og þróunarstarfi og leggur tillögur fyrir skólameistara um námskeiðahald fyrir starfsmenn.
Starfstími mötuneytis er 40 vikur að jafnaði og byrjar yfirleitt 21. ágúst ár hvert.
2.4.17 Ræstingafólk
Ræstingafólk sér um daglega ræstingu undir stjórn húsvarðar.
2.4.18. Stuðningsfulltrúar á starfsbraut Fjölbrautaskóla Norðurlands vestra
Yfirmaður stuðningsfulltrúa er skólameistari en hann felur fagstjóra/brautarstjóra og kennara daglega verkstjórn.
Starfsvettvangur stuðningsfulltrúa er fyrst og fremst á starfsbraut FNV en getur einnig verið á öðrum brautum skólans.
Starfslýsing:
Stuðningsfulltrúi er kennara til aðstoðar við að sinna einum eða fleiri nemendum sem þurfa sérstaka aðstoð. Starfið miðar fyrst og fremst að því að auka færni og sjálfstæði þessara nemenda, félagslega, námslega og í daglegum athöfnum. Starfið tekur mið af þar til gerðri áætlun sem hefur það að markmiði að draga smám saman úr þörf nemanda/nemenda á stuðningi í þeim tilvikum þar sem það er hægt.
Stuðningsfulltrúi:
1. aðstoðar nemanda/nemendur við daglegar athafnir og virka þátttöku í skólastarfi;
2. vinnur eftir áætlun sem kennari hefur útbúið í samráði við fagstjóra sérkennslu, sálfræðing eða annan ráðgjafa;
3. aðstoðar nemanda/nemendur við að ná settum markmiðum samkvæmt aðalnámskrá/einstaklingsnámskrá undir leiðsögn kennara;
4. aðlagar verkefni að getu nemandans samkvæmt leiðbeiningum kennara;
5. ýtir undir færni og sjálfstæði nemenda í námi og daglegum athöfnum t.d. með því að hvetja þá til að gera sem mest sjálfa og hrósa þeim fyrir viðleitni í þá átt;
6. aðstoðar nemendur við að fylgja settum reglum um hegðun, umgengni og vinnubrögð;
7. styrkir jákvæða hegðun nemenda samkvæmt almennum umgengnisreglum og vinnur gegn neikvæðri hegðun, t.d. með áminningum og með því að fylgja nemanda tímabundið afsíðis;
8. fylgist með og leiðbeinir um rétta líkamsbeitingu nemenda, notkun skriffæra o.s.frv;
9. aðstoðar nemanda/nemendur í félagslegum samskiptum innan og utan kennslustofu;
10. veitir nemendum félagslegan stuðning með því að hlusta á frásagnir og reynslu þeirra og spjalla við þá þegar aðstæður leyfa;
11. fylgir einum eða fleiri nemendum á ferðum þeirra um skólann, í frímínútum og vettvangsferðum og aðstoðar þá eftir þörfum;
12. situr fag- og foreldrafundi eftir því sem við á;
13. getur eftir aðstæðum einnig sinnt öðrum í nemendahópnum m.a. til að kennari geti aðstoðað nemanda sem þarf séraðstoð og til að draga úr sérstöðu nemenda með sérþarfir;
14. annast önnur störf sem honum kunna að vera falin af yfirmanni og falla innan eðlilegs starfssviðs hans.
15. er bundinn þagnarskyldu. Þagnarskylda helst þó látið sé af störfum.
2.4.19 Öryggisnefnd
Skólameistari tilnefnir af sinni hálfu tvo öryggisverði og starfsmenn kjósa tvo öryggistrúnaðarmenn úr sínum hópi. Báðir fulltrúar atvinnurekanda I öryggisnefnd teljast öryggisverðir og báðir fulltrúar starfsmanna öryggistrúnaðarmenn. Þeir skulu í samvinnu fylgjast með því, að aðbúnaður, hollustuhættir og öryggi á vinnustöðum séu í samræmi við lög nr. 46/1980 og reglur um heilbrigðis- og öryggisstörf innan fyrirtækja nr. 77/1982.
2.5 Þjónusta
2.5.1 Ljósritun
Ljósritun fyrir nemendur er fyrir framan aðstöðu nemendafélagsins á 2. hæð Bóknámshússins en nemendur þurfa að kaupa ljósritunarkort til að hafa afnot af vélinni. Ljósritunarkort fást á skrifstofu skólans.
2.5.2 Bóksala
Skiptibókamarkaður er rekinn á vegum nemenda í byrjun hverrar annar.. Einnig er námsefni selt á skrifstofu skólans.
2.5.3 Skólaakstur
Aðra hverja helgi er skólaakstur. Þá er ekið frá Heimavistinni á föstudagseftirmiðdegi til Siglufjarðar annars vegar og Hvammstanga hins vegar. Til baka er ekið á sunnudagskvöldum. Nánari upplýsingar um þennan heimakstur heimavistarbúa veitir heimavistarstjóri. Rútukort eru seld á skrifstofu skólans.
2.5.4 Skólagjöld
Skólagjöld eru ákveðin af skólanefnd, þ.e. innritunargjöld, efnisgjöld, tölvugjöld og leigugjöld á skápum. Nemanda er heimilt að standa utan nemendafélags og greiðir þá ekki gjald til þess. Nemendur staðfesta skólavist sína með greiðslu innritunargjalds og gangast þar með undir reglur skólans um umgengni og hegðun. Ef nemandi greiðir gjaldið ekki á tilsettum tíma er óvíst að hann fái skólavist.
2.5.5 Heilsugæsla í framhaldsskólum
Samkvæmt lögum um framhaldsskóla nr. 80/1996 13.grein stendur orðrétt:,,Í öllumframhaldsskólum skal rækja heilsuvernd. Sé heilsugæslustöð starfandi í nágrenni skólans skal fela henni heilsuverndina. Yfirlæknir heilsugæslu í umdæminu hefur umsjón með þessari starfsemi undir yfirstjórn heilbrigðisstjórnar og líta eftir að aðbúnaður og aðstaða nemenda og starfsmanna sé viðhlítandi Starfsfólk við heilsuvernd í skólum skal hafa náið samstarf við skólameistara um framkvæmdina."
Markmið skólaheilsuverndar er:
Að stuðla að líkamlegu, andlegu og félagslegu heilbrigði nemenda.
Markmiðin miðast að því:
1. Að nemendur hafi jákvætt viðhorf til heilbrigðra lífshátta.
2. Að nemendur tileinki sér heilbrigt og ábyrgt kynlíf og fái stuðning og leiðbeiningar þegar eitthvað fer úrskeiðis .s. ótímabær þungun og kynsjúkdómar.
3. Að nemendur sem eiga við andlega eða félagslega erfiðleika að stríða fái stuðning og flosni ekki upp úr skóla.
4. Að nemendur hafi þekkingu á skaðsemi reykinga, áfengis og fíkniefna og taki eigin ábyrga afstöðu til þessara mála.
2.5.5.1 Hlutverk hjúkrunarfræðings:
1. Að sinna heilbrigðisfræðslu: hafa þannig jákvæð áhrif á viðhorf nemenda til þess að tileinka sér heilbrigt líferni og auka þekkingu þeirra á leiðum til þess. Minnka þannig líkur á að nemendur tileinki sér hegðun sem ógnar heilsu þeirra s.s. að seinka eða koma í veg fyrir reykingar, áfengisdrykkju og neyslu annarra vímuefna.
2. Að hafa ákveðinn viðtalstíma: Þar sem nemendur geta gengið að því vísu að fá einstaklingsbundna ráðgjöf, stuðning og leiðbeiningar um þá þjónustu sem í boði er hjá öðrum aðilum.
3. Að vera virkur þátttakandi í að framfylgja forvarnarstefnu skólans.
4. Vera í forvarnarteymi ásamt öðrum ráðgjöfum.
5. Að hafa eftirlit með aðbúnaði nemenda.
