Áfallaráð og viðbrögð við áföllum

Áfallaáætlun FNV er ætlað að styðja við samræmd og fagleg viðbrögð og tryggja að nemendur, starfsfólk og aðrir sem málið varðar fái viðeigandi stuðning.
Viðbrögð eru ávallt metin út frá aðstæðum hverju sinni og lögð áhersla á nærgætni og virðingu fyrir þeim sem hlut eiga að máli og óskum aðstandenda.

Áfallaráð

Áfallaráð FNV fer með verkstjórn þegar alvarlegir eða válegir atburðir verða sem snerta nemendur eða starfsfólk skólans.

Í áfallaráði sitja:

• Settur skólameistari: Selma Barðdal Reynisdóttir s. 844-9874
• Aðstoðarskólameistari: Laufey Leifsdóttir s. 660-2075
• Áfanga- og verkefnastjóri: Grétar Karlsson s. 869-1757
• Náms- og starfsráðgjafi: Þorbjörg Sandra Magnúsdóttir s. 864-9255
• Félagsráðgjafi: Hrafnhildur Guðjónsdóttir s. 821-2910
• Skólafulltrúi: Sigríður Káradóttir s. 894-6016
• Verkefnisstjóri félagsmála nemenda: Vala Hrönn Margeirsdóttir s. 849-9448
• Heimavistarstjóri: Svanvít Gróa Guðnadóttir s. 869-6912

Áfallaráð getur kallað til aðra eftir þörfum, svo sem heilbrigðisstarfsfólk, sálfræðing, prest, fulltrúa nemenda eða aðra sem aðstæður kalla á.

Hlutverk áfallaráðs

Hlutverk áfallaráðs FNV er að:

1. Greina aðstæður og atvik sem geta kallað á sérstök viðbrögð innan skólans..
2. Útbúa, viðhalda og kynna áætlun um viðbrögð við áföllum.
3. Tryggja að skýrt verklag sé til staðar vegna bráðaveikinda, alvarlegra slysa, andláta og annarra atburða sem geta valdið áföllum eða sorgarviðbrögðum.
4. Meta hvenær þörf er á að virkja áfallaáætlun skólans.
5. Stýra og samræma viðbrögð skólans þegar alvarlegir eða válegir atburðir verða.
6. Stuðla að fræðslu um viðbrögð við áföllum og tryggja viðeigandi stuðning við nemendur og starfsfólk þegar áföll verða.

Hvaða atvik geta kallað á viðbrögð?

Áfallaáætlun skólans getur meðal annars tekið til:

1. Alvarlegra slysa nemenda, aðstandenda þeirra eða starfsfólks.
2. Alvarlegra veikinda nemenda, aðstandenda þeirra eða starfsfólks.
3. Langvinnra sjúkdóma nemenda, aðstandenda þeirra eða starfsfólks.
4. Andláts nemanda, aðstandanda hans, starfsfólks eða maka starfsfólks.
5. Náttúruhamfara.
6. Alvarlegra slysa eða hópslysa í samfélaginu.
7. Bruna í skólahúsnæðinu.

Viðbrögð eru ekki eins í öllum tilvikum. Áfallaráð metur umfang og eðli hvers atviks og skipuleggur viðbrögð í samræmi við aðstæður og þarfir þeirra sem hlut eiga að máli.

Þegar áfall verður

Þegar alvarlegur atburður verður er mikilvægt að upplýsingar séu staðfestar áður en þeim er miðlað. Skólameistari eða staðgengill hans kallar áfallaráð saman eftir þörfum og ráðið skipuleggur viðbrögð skólans.

Lögð er áhersla á að:

• tryggja öryggi og veita nauðsynlega aðstoð,
• miðla staðfestum upplýsingum með yfirveguðum og viðeigandi hætti,
• gæta að persónuvernd og óskum þeirra sem hlut eiga að máli,
• hlúa að nemendum og starfsfólki,
• tryggja að þeir sem þurfa fái viðeigandi stuðning,
• fylgja málum eftir eins lengi og þörf krefur.

Í neyðartilvikum skal ávallt hringja í 112.

Hægt er að hafa samband við Fjölbrautaskóla Norðurlands vestra í síma 455 8000.