Gervigreind í brennidepli – nemendur takast á í rökræðum

Gervigreind hefur verið mikið í umræðunni að undanförnu og áhrif hennar á samfélagið vekja bæði vonir og áhyggjur. Ákveðið var að bjóða upp á gervigreindaráfanga í vali á haustönn 2026 við FNV. Tólf nemendur eru í áfanganum en þar munu nemendur öðlast þekkingu í að nota gervigreind með ábyrgum hætti, beita gagnrýnni hugsun við upplýsingaleit og nýta gervigreindarverkfæri á fjölbreyttan máta. Kennari áfangans er Lee Ann Maginnis.  

Í síðustu viku fengu nemendur það verkefni að kafa ofan í umræðu um gervigreindina, skoða ólík sjónarmið og takast síðan á í rökræðum um kosti og galla gervigreindar. 

Nemendum var skipt í fjóra hópa og þurftu að færa rök annaðhvort með eða á móti aukinni notkun gervigreindar og áhrifum hennar á samfélagið. Verkefnið snerist þó ekki eingöngu um að hafa sterkar skoðanir. Hóparnir þurftu að afla sér upplýsinga, skoða fréttir og aðrar heimildir og styðja fullyrðingar sínar með traustum gögnum. Við vinnuna var jafnframt lögð áhersla á vandaðan frágang og rétta heimildanotkun samkvæmt frágangsreglum FNV.

Hver hópur fékk tíu mínútur til framsögu og að henni lokinni voru þrjár mínútur til að svara málflutningi andstæðinganna. Þar reyndi ekki aðeins á hversu vel nemendur höfðu kynnt sér viðfangsefnið heldur einnig á hæfni þeirra til að hlusta, bregðast við rökum annarra og verja eigin málstað. 

Verkefnið gaf nemendum tækifæri til að skoða eitt stærsta samfélags- og tæknimál samtímans frá ólíkum sjónarhornum. Um leið þjálfuðust þeir í upplýsingaleit, heimildamati, gagnrýninni hugsun, framsögn og rökræðum. 

Gervigreindin sjálf fékk því ekki að eiga síðasta orðið – að þessu sinni voru það nemendurnir sem þurftu að færa rökin.