Lokaverkefni vélstjórnarnema - stöðugleiki skipa

Fimm nemendur í vélstjórn við FNV kynntu nýverið lokaverkefni sitt í áfanganum Stöðugleiki skipa.
Í desember síðastliðnum var ákveðið að fara nýja leið í verkefnavinnunni og í stað hefðbundinnar ritgerðar hönnuðu og þrívíddarprentuðu nemendurnir báta með það að markmiði að þeir væru stöðugir í vatni og héldust uppréttir á floti.

Verkefnið var unnið í góðu samstarfi við Fab Lab Sauðárkróki, þar sem Karítas tók vel á móti nemendum og studdi við framkvæmd verkefnisins.
Í gegnum verkefnið öðluðust nemendur dýpri skilning á hönnunarforritinu Inventor og undirbúningi fyrir þrívíddarprentun í PrusaSlicer.

Sérstök áhersla var lögð á að skilja uppdrifskraft og áhrif hans á stöðugleika skipa, en uppdrifskraftur ræðst af því magni vökva sem hlutur ryður frá sér. Þessi þekking var lykilatriði í hönnun bátanna, auk þess sem nemendur þurftu að gera ráð fyrir þyngingu til að tryggja að skipin stæðu rétt á floti.

Bátarnir Freyja, Þór, Arnar, Hallur og Leki voru afrakstur verkefnisins og stóðust þeir allir flotprófið.

Verkefnið er gott dæmi um hvernig verklegt nám, nýsköpun og samvinna getur skapað áhugaverð og lærdómsrík verkefni fyrir nemendur.